Pizza Hut ku bunita gesto na ‘Nos Welita’

Willemstad- Novèmber 2013: Djarason mèrdia, empleadonan di Pizza Hut a bishitá ‘Nos Welita’ p’asina duna nan kontribushon den e temporada bunita di fin di aña. Ademas di hasi un gesto Pizza Hut ta duna kontenido na e filosofia di ta un ‘Bon Yu Di Kòrsou’. Empleadonan di Pizza Hut a traha diferente pakete ku e.o komestibel i otro produktonan doméstiko. “Nos ta masha kontentu ku e inisiativa di parti di nos koleganan di Pizza Hut, ta importante pa keda duna bida na e kampaña di ta un ‘Bon Yu Di Kòrsou’- nos tur den nos mes seno i segun nos mes forsa por kontribuí na un komunidat mas positivo i sigur mas uní spesialmente den e temporada aki”, esaki di akuerdo ku Sr. Randy Maurera di Hucor Holding N.V.

Empleadonan di tur 4 restorant di Pizza Hut riba nos isla a kontribuí ku e gesto aki, pues ademas di hasi e kontribushon na ‘Nos Welita’, pa e empleadonan e tabata un proyekto di trabou den ekipo. “Pizza Hut ta un restorant ku semper por a konta ku pueblo di Kòrsou, pues pa nos por duna bèk na nos komunidat ta algu ku ta opvio. Nos ta spera ku tur e grandinan ku biba òf pasa dia na ‘Nos Welita’ disfrutá i pasa dushi dianan di fiesta”, asina Sr. Maurera a finalisá.

Riba foto athuntu por haña un impreshon di e paketenan ku a keda entregá djarason mèrdia na Nos Welita. Un grupo di empleado a representá tur esnan ku ta laborá na Pizza Hut, Saliña, Sta. Maria, Brionplein i Brievengat pa hasi  e gesto.